सोलापूर : सोलापूरच्या के.एल.ई. स्कूलची विद्यार्थिनी रीत अंकित धरमसी स्वीमॅथॉन 2026 स्पर्धेत तिसरी आली आहे. मुंबईत झालेल्या 62 व्या ‘स्वीमॅथॉन’ या प्रतिष्ठित समुद्र जलतरण स्पर्धेत तिने उल्लेखनीय कामगिरी केली.
दि. 22 फेब्रुवारी 2026 रोजी मुंबई येथे ही राष्ट्रीय स्तरावरील स्पर्धा पार पडली. ही स्पर्धा महाराष्ट्र राज्य हौशी जलतरण संघटना यांच्या वतीने आयोजित करण्यात आली होती. राज्यातीलच नव्हे तर देशातील विविध भागांतील जलतरणपटूंनी या स्पर्धेत सहभाग घेतला.
2 किमी अंतर 19 मिनिटांत पूर्ण
रीतने 10 ते 11 वर्षे वयोगटात सहभाग नोंदवला होता. Sunk Rock Lighthouse ते Gateway of India या दरम्यानचे सुमारे दोन किलोमीटर अंतर तिने अवघ्या 19 मिनिटे 10 सेकंदांत पूर्ण केले. समुद्रातील लाटांशी सामना करत तिने ही कामगिरी साध्य केली.
पहिल्याच प्रयत्नात मोठे यश
विशेष म्हणजे, समुद्रातील खुल्या जलतरण स्पर्धेत सहभागी होण्याची रीतची ही पहिलीच वेळ होती. मात्र, पहिल्याच प्रयत्नात तिने तिसरा क्रमांक पटकावला. त्यामुळे सोलापूरच्या क्रीडा क्षेत्रात तिच्या यशाचे कौतुक होत आहे.
आंतरराष्ट्रीय प्रशिक्षक श्रीकांत शेटे यांची विद्यार्थिनी
या यशासाठी तिला सोलापूर येथील आंतरराष्ट्रीय प्रशिक्षक श्रीकांत शेटे यांचे मार्गदर्शन लाभले. रीत ही उद्योजक अंकित धरमसी यांची कन्या असून तिच्या या कामगिरीमुळे शहराचा मान उंचावला आहे.
